Mundart

Cunewaale (von M. Pamperin)
Mir senn Cunewaaler, du und iech und dar.
Schunn seit goanz poar Juhrn, miech ziehts oack hier har.
Seit iech bie gebuhrn, schlätt mei Harz fer diech.
Du, mei Cunewaale, ju, iech liebe diech.

Mir aus Cunewaale (von S. Rausendorf)
Mir quirln unsn Dialekt, dan breng oack mir oalleene.
Denn wenn dan mo a andersch redt, do klingt ar nimmi reene.

Refrain: Doas mir aus Cunewaale senn, do semmer raicht druff stulz.
Mir senn aus aaln Schrut und Kurn und aus goar karnch´n Hulz.

Und wenn mir o goar pulterch senn, doas hoat goar nischt zu soin.
Ba uns do is de Hauptsache: mir tun uns gutt vertroin.

Is sull ock enner kumm und soin, doaß mir nischt tä´tn mach´n.
Dar wird ba uns glei eigespoannt, bis tutt de Schwoarte krach´n.

Gebauert wird und o gewabt, mir giehn goar a de Steene.
Do koann geroade kumm woas will, uns kriegt doch nischt ne kleene.

Und assn tu mir gutes Zeug, do tutts ba uns ne hoapern.
Und sellts a mol nischt andersch gahn, do aß mir ganze Abern.

Ba uns do is an schinstn, doas muß a jeeds eisahn.
Mir tauschn mit kenn andern, o wenn se sunst woas gahn.

De Hitschltaxe vu Cunewaale (von M. Gutsche)
Ba uns, do gibbt´s vill ältre Leute, und unsre Rentner reesn heute
o garne mo durch unser Land, hoann ja nu Zeit ann Rentnerstand.
Oack uff de Beene kimmt moanchs ne furt, do koann´chs verstiehn,
wenn´s egor zwackt und sticht a de Benn und a de Knien.

Goar moancher kimmt derwaajn ne glei, gutt a die huchn Busse nei.
Vill winger is doas rimgekraxe, fährschte mit Leuthuld senner Taxe.
Ob de nu Moan bist oder Dame, mit Jense reest sich´s ganz bequame.
Steigste be dan an Kleenbus ei, hult Leuthuld Jens sei Hitschl glei.

Doas Hitschl liegt uff jeder Reese, a dar modernen Autoscheese,
poroat hinn a senn Kufferraum, wenn´s Waajngl fährt, do sistes kaum.
Hält´s Auto oa, ann Reeseziele, gibbt´s o kee grußes Rimgewiehle.
Aviergehult wird do de Hitsche, wenn uffe is, de Schieberitsche.

Und biste woacklch uff´n Benn, ward´s aussteign su oarg ne senn.
Durch´s Hitschl vor dr Schiebetiere, brauchste bestimmt ne oalle Viere.
Stürzn tutt ba dieser Schoße, kee eenzscher uff de Pfloasterstroße.
Oals Trepptriet hilft doas Hitschl immer, su doas nie wird a Rimgewimmer.

Stets hilfsbereit ver seine Gäste, hält´ch Leuthuld Jens ann Oarme feste.
Ganz sicher steigste aus und ei, bis doas de Reese is verbei.
Een jedr wird´s Euch immer soign, steig ei in Jens sei dichn Woign.
Un biste fürsch Reesn no zu aale, nimm´s Hitschltaxe vu Cunewaale.

De Reese uff Cunewaale (von H. Andert)
Kumm Hermine luß´dch ne heeßen, wull mir o amol verreesen.
Rick mir a doas schiene aale, hibsche Naastel, Cunewaale.
Ne Strawaale, ne Lawaale, o ne Heene, Heenewaale.
Nee nee, vu dan ganz´n waale, oack uff Cune, Cunewaale.

Refrain: S wird Euch ver Freedn is Harze bumbern,
wenn mir an Murgn durch de Heemte schlumpern.
Dr Buusch, de Barge, de frische Luft.
De Lirchn trillern, dr Kuckuck ruft.
Do wardt´r markn: ´s koann nischt Schinnersch gaahn.
Ja unse Lausitz müßt´r Euch besahn.

Hinter Schimmch, oack gleicherwege, ba dr Laube im de Eche.
Und durt liegn se nu do: Bieleboh und Czorneboh.
A dr Mittlst, a dr Spaale, steckt doas Naast, leit Cunewaale.
Oack dr Noase nooch gehaaln, kinn mir´n Waaig ju ne verfahln.

Kumm mir su vu Aberschbuche, uff Cunewaale zu Besuche.
Heeßt´s: Itz kumm de Aberschbächer, hoann de grußn Noasnlächer.
Aber sunst senn se ne iebl, immer rei, oack rei as Stiebl.
Ruhgt Euch aus de miedn Beene, tutt oack groade wie derheeme.